Nidderaanwen
Gemengewalen 2023
Wahlresultater
| Numm | Beruff | Uertschaft | |
| 1 | Josselijn (Jojo) CAMES-DE VRIES Spëtzekandidatin | Expertin anti-blanchiment | Nidderaanwen |
| 2 | Frank GOERGEN Spëtzekandidat | Bank Employé Member vun der Ëmweltkommissioun Tresorier dei gréng Nidderaanwen | Nidderaanwen |
| 3 | José Luis ACEDO | Europäesche Fonctionnaire (Affekot) Member Aanwensgaart Asbl Adept vun Ëmweltfroen | Nidderaanwen |
| 4 | Ben CARTER | Eco-Artist Illustrator & Graphic designer | Rameldang |
| 5 | Tun GEYER | Gemengerot Gemengebeamten an der Pensioun Member vun der Schoulkommissioun | Iernster |
| 6 | Laurent KALMUS | Bank Employé Relationship Manager | Nidderaanwen |
| 7 | Martine LAISSY | Comptabel | Hueschtert |
| 8 | Danièle LEVY | Europäesche Fonctionnaire an der Pensioun Member vun der Integratiounskommissioun Fréiere Member vum Auslännerrot CNE | Hueschtert |
| 9 | Karol MAZIUKIEWICZ | Expert-Comptabel | Senningerbierg |
| 10 | Dagmara MAZIUKIEWICZ-SOWUL | Finanzexpertin Bénévole bei der Fondation Cancer | Senningerbierg |
| 11 | Gregorio MONGELLI | Informatiker, dipl. Ingénieur ETH Member vun der Generatiounskommissioun | Hueschtert |
| 12 | Gina MULLER-ROLLINGER | Gemengerot Member vum Baucomité Presidentin déi gréng Nidderaanwen | Nidderaanwen |
| 13 | Jo SIMON | Ingenieur an der Pensioun | Senningerbierg |
Message vun eisem Spëtzekandidat / eiser Spëtzekandidatin
Léif Wielerinne, léif Wieler,
Zënter méi wéi 30 Joer fuerdert d’Partei déi gréng ëmmer nees op erneierbar Energiequellen ze wiessele, mä méi wéi dräi Joerzéngte laang gouf dës Fuerderung net eescht geholl. Déi traditionell politesch Parteien hunn d’Entwécklung vun erneierbaren Energien als e marginale Phenomen ugesinn. Dee schreckleche russesch-ukrainesche Krich huet d’Leit zum Ëmdenke bruecht. Haut fënnt een d’Produktioun vun erneierbaren Energien an de Walprogrammer vu bal alle politesche Parteien. Doraus ergëtt sech datt d‘Energietransitioun net méi ideologesch, mä wéinst dem Klimawandel onvermeidlech ass.
Zënter 2005 sinn déi gréng am Gemengerot vun Nidderaanwen vertrueden, fir d’éischt mat enger gewielter Vertriederin, duerno vun 2017 un, mat enger Vertriederin an engem Vertrieder. Déi gréng konnten an all deene Joren an der Oppositioun hir Meenung net nëmme bei ökologeschen Themen abréngen, mä och an allen anere Beräicher vun der Gemengepolitik.
Well mir en oppent Ouer fir d’Awunner·inne hunn, sinn hir Fuerderungen an de Walprogramm vun déi gréng agefloss a vill vun deenen Iddie sinn an de leschte Jore realiséiert ginn. Zum Beispill:
- De Foussgängerwee tëschent Nidderaanwen a Mënsbech (Fuerderung vun 2005!)
- D’Schafe vun enger plurikommunaler Fotovoltaik-Kooperativ
- D’Aféierung vu véier Poubellë fir d’Offallsortéierung ze optimiséieren
Am Walbezierk Zentrum ass et virun allem d’Realisatioun vum neien Tram an der Stad vun engem gréngen Transportminister, eng Tramslinn déi geschwënn bis op de Sennengerbierg kënnt. Wat d’Mobilitéit an den ëffentlechen Transport ugeet, wäert dat e Virdeel fir d’Awunner·inne vun der Gemeng Nidderaanwen ginn.
Fir d’Gemengewale vum 11. Juni 2023 präsentéieren déi gréng eng Lëscht vun 13 dynamesche Kandidaten, déi vun der Gemengepolitik motivéiert sinn. Och wann d’Geschlechterparitéit net erreecht konnt ginn, hu mir awer versicht eng ausgeglache Lëscht ze präsentéieren, déi Leit vu fënnef verschiddenen Nationalitéiten, Aktiver, Pensionéierter zesumme bréngt, sou datt eng optimal Representativitéit vun den Awunner·innen aus der Gemeng Nidderaanwen garantéiert ass.
An der deeglecher Aktualitéit mierke mir, datt d’Gemeng Nidderaanwen trotz gewëssen Ustrengunge beim Wuelbefannen a bei der Liewensqualitéit, bei wäitem nach keng exemplaresch Gemeng ass.
A Saache Gemengepolitik ginn et nach grouss Erausfuerderunge wéi:
- De Mangel u bezuelbare Wunnengen, besonnesch Appartementer (Verkaf a Locatioun)
- D’Virgoe géint d‘Buedemspekulatioun
- D’Schafe vu gemeinsame Beräicher (shared space) an de Citéen
- D‘Planze vu Beem an Hecke fir d’Temperature bei Hëtztwellen an de Wunnstroossen ze reduzéieren
- D’Produktioun vun erneierbarer Energie (Fotovoltaik)
- Den Ausbau vun der doucer Mobilitéit
- D’Verhënnere vun Abréch duerch präventiv an ofwierend Video-Iwwerwaachung
- D’Nodeeler vum Stroosseverkéier
Déi Gréng Nidderaanwen si prett fir politesch Verantwortung ze iwwerhuelen, virausgesat d’Prioritéite vun hirem Programm gi respektéiert.